Fideltasuna

            Azken boladan inguratzen nauen giroa dela medio, gertakizun zehatzen batuketa kontingentea dela medio, bikoteen arteko fideltasunaren balioestea gainbeheran dagoela agertzen zait. Azken finean, errealitatea dramaturgo bihurriak eszenaren aurrean argiekin, itzalekin eta ikuspuntuekin jolastuz gauzatzen duen antzezpena besterik ez da. 

             Mojak baino onestasun antza gehiago zuen emakumeari ikusi diot maitalearen laztanei amore ematen, monotonia ernegagarriaren doinu zimelak hautsi zezaken dantza erritmodun eta erora ematen. Sistematikoki ez leialak, noizean behingoak eta ustekabekoak. Aita ere amarekin izan zen desleial.  

            Halere, badaukat laguna, baloreen endekapen guztietan bezala anakroniko, zaldun ibiltari, On Kixote, okerkerien zuzentzaile, irauten duena, el amor antojadizo no busca cualidades, sino hermosuras eta bikote bakarrekoa dela esaten duena, amodioan sinesten duela dioena. Ikusi beharko zenukete nola engañatzen duten!

            Memoria zeukan animalia bakarra gizakia zela eusten zuen Nietzschek. Hortaz zentzu moral batean promes egiteko gaitasuna dugu, orobat ahazteko ahalmena. Gure esku dago. Egunsentia itsumustuan ailegatzen denean eta amoranteak adulterioaren ohea abandonatzen duenean, bakartasunean adulteriogileari bururatu beharko litzaizkioke fideltasunari buruzko hainbat galdera; eta aldi berean, goiznabarra pitinka-pitinka narrasten denean eta bizikideak zilegitasunaren ohea okupatzen duenean, bere kontzientziaren bakartasunean zintzoari otu beharko litzaizkioke fideltasunari buruzko zenbait itaun.

            Norekin edo zerekin izan zara leial? Hitzemanarekin izan al zara? Erosotasunarekin ala lasaikeriarekin izan al zara? Momentuarekin, atmosferarekin, instintuekin, arrazoiarekin leial? 

            Zure buruarekin izan al zara fidel? Azkenik, horra hor fideltasunari buruz baietsi daitekeen azken gauza gure buruarekin fidelak izan gaitezen.

Ze begi...

...ederrak dituzun. Bai utzi esaten, zuk ez dakizu zer den horrelako begiak ikustea. Begira egon eta begiratuko dizuten ez jakitea, eta begiratzen badizute, nola egingo duten ezin imaginatzea. Begiratzen ez dizuten bitartean, lasai edo haserre zauden ezin erabakitzea. Eta begiratzen dizutenean, berriz, begirada aldendu beharra, eta begira jarraitzen ote duten ez jakitea. Zure begiei begira aritu naizela esaten badizut, era askotan erantzun zenezake, baina aukeren artean ez dago: "ni ere zuri begira aritu naiz" esatea, ez baitzara aritu, badakit nik hori. Ondo zabiltzala diozu? Ni ez ba. Aio.

Ander Shy

Emakume entzun ezazu

Ez utzi zure ideiak usteltzen,

Zuk eman baino garrantzi gehiago dute.

Ez zaitezen manipulatu,

Engainuarekin bat zure ametsak zapuztera zaramatzate.

Zerbait hobea merezi duzu,

Zergatik itzultzen zara bere magalera?

Ubeldura horiek.. 

Benetan dutxan erori zara?

Zergatik ez zaitut kalean ikusten?

Okupatuegia zaude gizonaren ipurdia mihazkatzen. Ez naiz ari ezer asmatzen.

Lehen hain alaia zen emakumea, zergatik dirudi umetzen?

Oilo busti dirudizu, oilarraren inguruan dantzatzen.

Txontxongilo, eten zure lokarriak. Ez utzi erabilia izaten!

Emakume ihes egin zazu! Ez saiatu ni engainatzen. Askatasuna eta

 nortasunarengatik borrokatu,

Zu zein zaren mundu honek jakin dezan, gure laztana saiatu berriz zu izaten;

Itzultzen, bizitzen.


Leire Artozki Beorlegi

Basamortuan ez dago arimarik

Hatz apurtuen artetik lauki-mundu honetara isurtzen den odol delako arima urdin honek zure begi, pentsamenduak gidatzen dituela, elkartzen gaituzten lautada hauek zeharkatzen ditut narrats, herren, itsu, batzuetan burugabe, arima huts, neguko azukre hotzak estaltzen duelarik nire gorpua, norbaitek nirekin estropezu egin eta esnatuko den esperoan, ezabatuaren isiltasun oihu zentsuratuen baso sarri honen baitan.

Hiriart

Neguko distirak

Neguko eguzki-izpiek laranjondoan oraindik eskegirik dauden fruituetan orrazten duten urrezko distira baino gauza desiragarriagorik ez dagoela otu zait derrepente. Bizitza naturalean dakienarentzat aurkitzen eskutaturik baitaude hamaika eta bat plazer, garai berriek dakartzaten, hydraren buruak balira bezala ugaltzen diren, hamabi eta bat bizioak ez bezala.

Neguan arratsalde bero bat, lorategiko zuhaitzen hazte hautemanezina sumatzearen jolasa, labanaz laranja zuritu azalarekin akordeoi kiribiltsua sortzeko eta konpainia on bat.

Igaliari muxu eman eta mamia negarrez eztarrira arte sentitu, han dago bizitzaren sekretu bat gordeta, zuhaitzetan eskegirik eta azalezkoaren azpian ezkutaturik. Ez desiratu gehiegi, horrela hitz egingo luke Epikurok.

Laino putzuetan

Laino putzuetan
igeri egiten dut
nahi ez dudanean ere
goizero, astero...

Denborak aurrera egiten du
galdetu barik
hosto iragangaitzak bagina bezala
bizia pitinka xurgatzen digu
ta gu, mutu.

Ekaitzaren zorabioan
galduta,
ea adar jagoleren batek
helduko ote gaituen
amets eginez.

Gurea ez den bizitza igaroko omen da.
Hamaika bizi enbor bakarrean.
Denak nireak,
denak nigan.

Aurkitu nazazu zeinetan,
gai baldin bazara!

Idoia Carramiñana

 

https://www.facebook.com/pages/Idoia-Carramiñana-Poësis/631307460233588

Batzuetan errazago

Batzuetan, errazago

maite zaitut argazkietan

aurrez aurre baino.

Poesia idazten dut

maite zaitudala adierazteko;

lehen ez zintudan maite
eta orain bai.

Idazten dut

zer naizen adierazteko,

eta lehen ez nintzen
eta orain banaiz.

Neska bat

munduaren gailurrean,

barraskilo ttiki bat eskuan
eta, guztia, babesteko gai den

irribarrea aurpegian.

Ander Shy

Ermua

Ermua
zauri bat zara
Euskal Herriko gorputzean.
Mendi hegalen artean
bahiara ireki balizu bezala
biktimaren eta borreroaren arteko aldea bezain
zorrotza den labanak.  

(Mendi tontor baten ikasten duten ikasleei eskania)